ସ୍ନେହର ମହିମା - ଶାଶ୍ୱତିକା ବେହେରା
ସ୍ନେହପୂର୍ଣ୍ଣ ଚକ୍ଷୁ ସୁନ୍ଦର ଦିଶଇ
ଥାଏ ଯଦି ମିଠା ଠାଣି
ସ୍ନେହଭରା କଥା ମଧୁର ଲାଗଇ
ଶୁଭେ ଯଦି ମିଠା ବାଣୀ |
ମାଆର ମଧୁର ସ୍ନେହଭରା କଥା
କୋଟି ଦୁଃଖ ହରିନିଏ
ବାପାଙ୍କ ଆଦର କହିଲେ ନସରେ
କେତେ ସୁଖ ଦେଇଥାଏ |
ଟିକି ପିଲାଟିର ଦରୋଟି ହସରେ
ସବୁ ବ୍ଯଥା ଦୂର ହୁଏ
ସ୍ନେହବୋଳା କଥା ଶୁଣିବା ମାତ୍ରକେ
ହୃଦୟ ତରଳି ଯାଏ |
ଆତ୍ମା ପରମାତ୍ମା ସ୍ନେହର ମିଳନ
କେ ପାରିବ ଅବା ଭୁଲି
ସକଳ ସୁଖର ଆକାର ସେ ଦୃଶ୍ୟ
ଅନ୍ତର ଦିଅଇ ଝାଳି |
ଆସ ସର୍ବେ ପ୍ରଭୁ ପଥ ଅନୁସରି
କରିବା ତାକୁ ସ୍ମରଣ
ସଂସାର ତାଙ୍କର ବିଶାଳ ବଗିଚା
ଆମେ ଆତ୍ମିକ କୁସୁମ |
Post a Comment